Este mércores aprobouse a saída a concurso das actuacións previstas na cuberta do Teatro Rosalía de Castro, necesarias polas incidencias e episodios de filtración que se detectaron ao longo destes anos.

Na comparecencia de hoxe ante os medios de comunicación, tras a Xunta de Goberno Local, o concelleiro José Manuel Lage Tuñas lembrou que "hai unha década, no 2014, un temporal deixou danos importantes no teito do teatro, e entón levouse a cabo unha actuación para reparalo, mais por desgraza aquela intervención fíxose sen empregar os métodos máis axeitados", facendo perforacións na cuberta de zinc, a causa das cales esta foise degradando co paso do tempo e comprometendo a súa estanquidade.

Lage subliñou a necesidade de actuar sobre os exteriores do teito: "Atendendo ás avaliacións efectuadas, a solución máis viable é executar unha sobrecuberta de zinc sobre a xa existente e mellorar, en paralelo, os accesos á cuberta para garantir un correcto mantemento dela".

A previsión do Concello é destinar 414.000 euros a esta actuación, que sae xa a concurso co obxectivo de axilizar prazos e intervir no Teatro Rosalía cunha perspectiva que dea resposta ás súas necesidades a medio e longo prazo.

Sae a concurso a xestión do Centro de Día de Novoboandanza

Xa no referente aos investimentos previstos en materia social, a Xunta de Goberno Local aprobou hoxe a saída a concurso do contrato de xestión do servizo comunitario municipal no Centro de Día Novoboandanza, ao que se destinará un orzamento superior aos 900.000 euros ata o ano 2028.

Ademais, hoxe tamén se deu luz verde á licitación do servizo de comedor social tanto no Centro Cívico municipal de Novoboandanza como no de Monte Alto, cun investimento conxunto que chega case aos 400.000 euros, tamén ata o 2028.

O programa Idiomas do Mundo, dotado con 300.000 euros ata o 2027

Por outra banda, na Xunta de Goberno Local aprobouse a licitación do contrato para xestionar o programa de inmersión lingüística 'Idiomas do Mundo', unha iniciativa financiada polo Concello e que, ano tras ano, permite que máis de 30 mozas e mozos coruñeses gocen dunha estadía intercultural dun mes en Irlanda, convivindo cunha familia nativa, asistindo a clases de idiomas e perfeccionando o seu dominio do inglés.

"Agora, o que facemos é iniciar os trámites administrativos para contratar a empresa que xestionará o programa nos vindeiros dous anos", explicou Lage.

Ata o 2027, o Goberno de Inés Rey destinará case 300.000 euros a Idiomas do Mundo, cifra que se suma á que tamén se inviste noutros programas formativos internacionais como as Bolsas Norteamérica, que pechou onte o seu prazo de solicitudes de cara ao curso que vén.