Este luns, 19 de maio, celebrarase unha nova sesión do ciclo Poetas Di(n)versos, a penúltima desta edición. Este programa, dirixido pola Premio Nacional de Poesía Yolanda Castaño, ofrece recitais de poetas galegos/as e foráneos/as cada mes no auditorio do Centro Sociocultural Ágora. A sesión comezará ás 20.00 horas e a entrada será de balde ata completar capacidade. Tamén será posible seguila a través da canle de Youtube de Poetas Di(n)versos.

"Desde o Goberno de Inés Rey seguimos apoiando unha iniciativa xenuína e única a nivel galego que permite á cidadanía coñecer e gozar ao vivo de grandes nomes da poesía, tanto do país como internacionais", apunta Gonzalo Castro, concelleiro de Cultura e Turismo. Nesta ocasión, participarán a poeta da Mariña luguesa Natalia Alonso e o poeta indio Subhro Bandopadhyay.

Nacida no norte, en concreto en Vilaronte, no concello de Foz en 1983, Natalia Alonso Ramos é poeta e xornalista. Licenciouse en Xornalismo e é doutora en Comunicación Audiovisual e Publicidade.  Na actualidade exerce como redactora no Gabinete de Comunicación da Universidade de Santiago de Compostela. Na súa faceta literaria gañou o premio de poesía que outorga a Asociación Cultural O Facho coa obra A síndrome de Hayworth (2019) e a terceira edición do Filomena Dato que convoca o Concello de Bergondo coa obra Advertencias para un traxecto boreal (2023). 

En narrativa obtivo en 2022 o segundo premio do certame de narracións breves 'Manuel Murguía' do Concello de Arteixo coa obra En directo, que se publicará este ano dentro do volume de relatos A garza alucinada. Algúns dos seus poemas foron publicados en revistas como a senlleira Xistral ou en obras colectivas como O libro das abellas (2024). 

Por outra banda, Subhro Bandopadhyay (pseudónimo de Subhransu Banerjee) naceu en Calcuta, A India, en 1978. Fixo estudos universitarios de Bioloxía e de Lingua Española. Empezou a publicar poesía en revistas bengalís de importancia sendo aínda moi novo. Ata hoxe publicou cinco poemarios en bengalí e, en tradución ao español, La ciudad leopardo (2010), Poemas metálicos (2014) e Sumar sal (2018). 

Recibiu a Bolsa Internacional Antonio Machado de Creación Poética no ano 2008 e o Premio Nacional de Escritores Mozos da Academia Nacional de Letras da India en 2013. Os seus poemas foron traducidos a linguas tan diversas como, entre outras, inglés, hindi, árabe, alemán, galego ou maratí. Participante en numerosos eventos literarios, feiras do libro e festivais poéticos de sona, na actualidade reside en Nova Delhi, onde é profesor de español no Instituto Cervantes.