O Concello reforza a súa programación cultural na rede municipal de Museos Científicos Coruñeses, que suman unha nova exposición fotográfica no Aquarium Finisterrae, «Unha historia de pingüíns», con imaxes tomadas por Sergey Antonenko, un fotógrafo ucraíno residente na Coruña.

A mostra está formada por 15 imaxes de pingüíns antárticos realizadas por Antonenko, apaixoado viaxeiro que dedicou gran parte da súa obra á cuestión da auga e os seus habitantes, fotografándoos en lugares como Groenlandia, Islandia, a Antártida, Terra do Lume e Sudáfrica. Os seus traballos foron galardoados en concursos internacionais, como o Prix da Photographie que recibiu en 2025, ou o Paris (PX3) de bronce na categoría «Natureza/Auga», pola súa serie «Icebergs».

As fotografías desta exposición amosan diversos aspectos da bioloxía, comportamento e hábitat dos pingüíns, así como as ameazas ás que están expostos. Son aves adaptadas á contorna antártica mariña, e a súa historia biolóxica está condicionada polos cambios climáticos que condicionan a expansión e contracción dos xeos. Das 18 especies coñecidas, 11 están ameazadas, e o quecemento climático está a provocar o descenso das súas poboacións.

A exposición, habilitada no corredor López Seoane do acuario coruñés, supón un novo aliciente para achegarse ao museo, onde, como lembrou o concelleiro de Cultura e Turismo, Gonzalo Castro, tamén está aberta a visitas a mostra fotográfica «Antropoceno», de Fernando Moleres, baseada na época xeolóxica que a humanidade creou alterando o clima, a xeoloxía e o ecosistema planetario.

"Ambas as mostras redondean perfectamente a oferta divulgativa coa que xa conta o Aquarium Finisterrae, un espazo único que amosa o vínculo da nosa cidade co océano e, ademais, está concibido para un público interxeracional", indicou o edil, que animou á cidadanía a visitar o museo aproveitando a apertura destas dúas exposicións.