A alcaldesa, Inés Rey, e o secretario xeral de Institucións Penitenciarias do Ministerio do Interior, Ángel Luis Ortiz, asinaron este mediodía un convenio de colaboración para que 39 penadas/os presten actividades de utilidade pública no Concello dentro do seu ámbito competencial e en beneficio da comunidade. Este acordo trae implícita a creación dunha comisión de seguimento das e dos traballadores que ocuparán postos de axudantas/es de estación, de peoas/peóns de mantemento e como persoal de apoio nas conserxerías dos mercados municipais e centros cívicos, sen que isto implique un impacto negativo nas prazas actuais e futuras que ofreza a Administración local.

Neste aspecto, a alcaldesa, Inés Rey, destacou que unha medida deste alcance non podería levarse a cabo sen a cooperación estreita entre ambas as institucións e sen o rigor e seguimento que realiza Institucións Penitenciarias. O Concello parte destas 39 vacantes, pero a idea é darlle continuidade ao programa no futuro. Na sinatura tamén estiveron presentes o director do Centro de Inserción Social da Coruña, Miguel Ángel Rodríguez, e o director xeral de Institucións Penitenciarias (IIPP), Miguel Ángel Vicente, e mais a concelleira de Igualdade, Yoya Neira.

Desde a Área de Igualdade, Benestar Social e Participación sinalan que a iniciativa favorecerá a inclusión das e dos inscritos ao programa e fomentará a súa participación e colaboración como parte importante do desenvolvemento comunitario. Recordan que a inclusión se orienta a todas as facetas da vida da persoa, desde o plano persoal ao social pasando polo laboral. Así mesmo, farase un especial fincapé en preservar o ámbito de traballo destas persoas, de forma que a infracción cometida non supoña, ademais da sanción, a incidencia negativa neste eido co fin de evitar que perdan o emprego.

O Concello comprométese tamén a impartir os coñecementos e o material necesarios para que poidan desempeñar a actividade que se lles asigne dun xeito eficaz. A Administración penitenciaria, pola súa parte, encargarase da valoración das e dos penados e, a través do Servizo de Xestión de Penas e Medidas Alternativas, a xestionar e facer un seguimento da condena en colaboración co Concello. Tamén será responsabilidade de IIPP a cobertura das continxencias que lle corresponden ao Instituto Nacional da Seguridade Social por accidentes de traballo ou enfermidade profesional.