O Concello adxudicou o contrato para o Programa de Lecer Cultural do Instituto Municipal Coruña Espectáculos (IMCE), que ofrecerá un servizo reforzado de actividades adaptadas a diferentes públicos durante todo o ano. O investimento para este curso aumenta substancialmente e chega aos 279.642 euros, dobrando a contía previa, un desembolso que busca blindar e ampliar a prestación municipal. Esta programación forma parte das políticas públicas de dinamización cultural e lúdica promovidas polo Goberno de Inés Rey, que busca promover un modelo de entretemento sostible, inclusivo e accesible para toda a cidadanía. O número total de prazas para as persoas usuarias tamén aumentará, situándose nas 11.205, un milleiro máis que o ano pasado.

"Neste Goberno cremos que todo o mundo ten dereito a gozar dunha oferta pública de actividades de calidade, por iso o Concello pon todos os recursos ao seu alcance para ofrecerlle a mellor programación á cidadanía, aumentando o investimento, o persoal e as prestacións deste servizo", subliñou o concelleiro de Cultura e Turismo, Gonzalo Castro.

No contrato, adxudicado á empresa Sportmadness Eventos, SL, inclúese un contido moi variado como obradoiros, programas de lecer de outono e primavera, os campamentos de Nadal e verán, as actividades de clausura, os obradoiros monográficos e o programa de sendeirismo. O persoal profesional a cargo das actividades tamén aumentará. Haberá 9 monitores que ademais terán formación especializada en Necesidades Educativas Especiais (NEE). En total, o programa incluirá o desenvolvemento de 27 talleres -incluídos 4 talleres específicos para maiores-, 12 sesións de outono e 14 de primavera dos ciclos temáticos -con relatores e relatoras en todos os encontros-, 20 excursións urbanas e 20 saídas exteriores, unha programación de senderismo con 20 rutas para adultos e 9 para nenos e nenas -clasificados segundo a dificultade e duración- e unha oferta de campamentos estruturada por grupos de idade e diferentes temáticas. Ademais, o elemento da identidade coruñesa será central na planificación, promovendo unha forma de lecer pegada ao territorio. 

Outro dos puntos reforzados no contrato é a blindaxe das condicións laborais do persoal empregado. Así, establécese no acordo que calquera incumprimento das obrigas salariais ou de Seguridade Social -xa sexa un atraso puntual duns días ou unha falta de pagamento - tipificarase directamente como infracción moi grave dentro do réxime de penalidades do contrato, o que implica que, cada vez que se produza este tipo de incumprimento, resulta de aplicación a penalidade máxima prevista pola lei: un 10% do prezo do contrato, IVE excluído ou incluso motivo de activación da cláusula de resolución do contrato.