A alcaldesa, Inés Rey, recibiu esta mañá os trinta novos axentes da Policía Local no Palacio de María Pita, logo da súa toma de posesión. O Concello aumenta deste xeito o cadro de persoal cunha trintena de axentes, o que supón chegar a preto de 360 profesionais no servizo activo.

Esta é a incorporación de novos axentes máis numerosa dende o 1992. Dos trinta novos profesionais, cinco incorporaranse inmediatamente mentres que os restantes accederán á academia para completar a súa formación nun período de seis meses. Os tres meses seguintes incorporaranse á Policía Local da Coruña en período de prácticas, entrando a formar parte como funcionarios de carreira a finais de ano.

Este reforzo do cadro de persoal da Policía Local xa fora avanzado pola alcaldesa na toma de posesión doutros 10 novos axentes o pasado mes de outubro, comprometéndose á incorporación de 30 novos profesionais a comezos de ano. Desde o 2018 a oferta de prazas chega a 106.

A alcaldesa explicou que esta convocatoria amosa o compromiso do Goberno local coa seguridade da cidade. "Comprometémonos a reforzar o servizo da Policía local e hoxe recibimos a 30 novos axentes, cumprindo o compromiso coa maior incorporación das últimas tres décadas", sinalou a alcaldesa. Rey recibiu os axentes acompañada pola concelleira de Seguridade Cidadá, Montserrat Paz.