A alcaldesa, Inés Rey, inaugurou esta mañá o novo Centro Cívico do Birloque, que vén de ser reformado integralmente para ofrecer un espazo moderno, funcional e accesible ao servizo do barrio. A intervención supuxo un investimento de case 1 millón de euros, financiado a través de fondos europeos.

Durante o acto, a rexedora destacou que o centro é "un símbolo do compromiso local co barrio e coa igualdade de acceso aos servizos públicos en toda a cidade". Engadiu que "non hai barrios de segunda; todos e todas temos dereito a espazos dignos para vivir, aprender, medrar e compartir".

O edificio incorpora salas polivalentes con acceso independente desde o exterior, espazos para actividades, unha sala de informática, despachos para entidades e servizos sociais, ademais de zonas comúns melloradas para o uso diario da veciñanza.

Rey subliñou tamén a importancia da participación veciñal na posta en marcha do equipamento. Nese sentido, a implantación da programación farase de maneira progresiva. Este luns iniciarase un proceso de participación veciñal, dinamizado por unha profesional, para que as propias persoas usuarias e veciños e veciñas poidan achegar suxerencias sobre horarios e actividades a desenvolver no centro. Unha vez finalizado, o equipamento quedará integrado na programación da rede municipal de centros cívicos.