O Concello sacou a licitación as obras para instalar un novo ascensor no Centro Cívico de Labañou, que substituirá á anterior unidade, inactiva debido a unha avaría. O orzamento base de licitación do proxecto é de 48.208,61 euros, e o prazo aproximado de execución é de 18 semanas. Ademais, tamén saíu a licitación outro contrato para a realización de varios traballos de renovación das paredes e solos do edificio, cun investimento duns 47.566,13 euros.

Estas intervencións englóbase dentro do paquete de melloras estruturais que o Goberno de Inés Rey está a levar a cabo en toda a rede de centros cívicos da cidade, cun investimento total de máis de 1,58 millóns en acciones de modernización e mellora nas diferentes instalacións da rede municipal.

"Coidar os centros cívicos da cidade é coidar a cultura de barrio. Estes puntos de encontro son fundamentais para afianzar as identidades e as relacións de veciñanza. Por iso o Goberno de Inés Rey vai seguir poñendo todos os recursos dispoñibles ao dispor da modernización destes lugares tan importantes", subliñou a concelleira de Benestar Social, Participación e Igualdade, Nereida Canosa. 

Un novo ascensor

As actuacións iniciais consistirán na desconexión completa do ascensor existente, incluíndo a parada e bloqueo de todos os seus sistemas, así como a desconexión da instalación eléctrica asociada. Así mesmo, procederase á retirada das instalacións vinculadas ao cuarto de máquinas, incluíndo cadros eléctricos, cableado, sistemas de control e demais elementos auxiliares. 

A continuación, levarase a cabo o desmonte e retirada do equipo antigo, que comprende a cabina, contrapesos, guías e demais elementos mecánicos, asegurando en todo momento a conservación do oco do ascensor e da estrutura do edificio. Estas operacións realizaranse minimizando a afectación ao resto das instalacións e espazos do Centro Cívico. 

Finalmente se procederá a instalar un novo ascensor accesible, cumprindo a normativa vixente en materia de seguridade, accesibilidade e eficiencia enerxética. A intervención inclúe a montaxe da cabina, contrapesos, guías e sistemas de seguridade, así como a integración dos mandos e elementos de control. O novo elevador terá capacidade para 8 persoas e uns 630 quilos de peso. 

Solos e paredes

Este segundo contrato que sae a licitación consiste na reparación e acondicionado dos chans de tarima existentes no Centro Cívico, ademais dos traballos para a recuperación do acabado superficial dos radiadores das plantas baixa e primeira, así como o acondicionado dos paramentos verticais da primeira planta e dos panelados de madeira.