O concelleiro da Área de Fomento e Promoción da Cidade, Gonzalo Castro, informou hoxe no Pleno municipal de que o Salón Internacional do Cómic da Coruña 'Viñetas desde o Atlántico' pasará a contar con Manel Cráneo como director artístico.

Cómpre lembrar que Cráneo, fundador e responsable do selo Demo Editorial, asumirá o seu novo cargo xa na edición deste ano, a número 27 dun festival que é un referente da banda deseñada a escala mundial, con milleiros de persoas asistentes ano tras ano.

A elección de Cráneo como novo director artístico do 'Viñetas desde o Atlántico' foi posta en valor por Gonzalo Castro, que lembrou que o artista herculino "xa foi unha figura fundamental na edición do ano pasado, de absoluto consenso en todo o sector", e incidiu en que "conta cunha traxectoria impecable".