O parque de Santa Margarida acollerá entre o venres e o sábado dúas das citas imprescindibles coa escena alternativa local: o Festival Independente Rock Coruñés (FIRC) e o Festival de Electrónica Coruñés (FEC). Desta maneira, tanto o rock como a electrónica pasan a ocupar espazos centrais nas festas.

Tanto FIRC como FEC fundamentan a súa liña de programación na integración no seu cartel de artistas consagrados con bandas locais, de forma que o público poida coñecer, desde a proximidade e de forma gratuíta, as propostas de figuras pouco habituais no circuíto de salas ou festivais galegos, á vez que se pon en valor o traballo de artistas emerxentes ou cunha traxectoria consolidada na escena coruñesa. Ambos os dous festivais enmárcanse dentro das políticas de promoción da cultura e da música locais que está a levar a cabo o Goberno de Inés Rey.

A primeira cita será o venres 19 coa recuperación do FIRC, un evento creado para a difusión do rock máis duro e que volve á programación das Festas de María Pita tras varios anos de ausencia. O prato forte da cita será Sons of Aguirre & Scila, grupo de rap metal pouco habitual na escena galega.

O FIRC 2022 contará, ademais, con Moura, que estrea este ano 'Axexan, espreitan', un disco que destaca pola calidade coa que integran o folclore co rock psicodélico e progresivo. A xornada tamén inclúe o directo do grupo local Display of Power, unha das mellores bandas tributo a Pantera e que estrean no FIRC, na súa cidade, a xira dos seus 20 anos sobre os escenarios.

No cartel do Festival Independente Rock Coruñés tamén figura Rapariga DJ, o proxecto musical da fotógrafa Cristina Pontanilla co que está a virar por diversos festivais de Galicia. Completan o cartel a banda de nova formación Wetsocks.

A programación do Festival de Electrónica Coruñés

Doutra banda, o FEC repite por segundo ano consecutivo no parque de Santa Margarida para ofrecer un maratón de música electrónica, xa que a xornada comezará ás 17.00 horas e finalizará sobre as 3.00, dando a oportunidade de coñecer o amplo espectro que cobre a música electrónica a través do traballo de artistas internacionais, nacionais e locais.

Lady Starlight é unha das cabezas de cartel deste FEC 2022. A artista americana, difícil de ver en directo en Galicia, presenta un show de techno de gran calidade. Outro dos nomes máis destacados é o de Radioactive Man, artista británico apoiado por unha extensa traxectoria. Completa o trío de pratos fortes un referente na escena estatal, a compositora e DJ galega Cora Novoa, afincada en Barcelona.

A programación do FEC 2022 contará cunha ampla selección de artistas locais. É o caso de Grobas, un dos DJ da cidade máis coñecidos nos xéneros de ambiente, electro, techno ou house, e apoiado por 25 anos de carreira. Tamén participará RJ Junior, DJ e promotor coruñés con dúas décadas de traxectoria; así como o dúo conformado por Roi & The Panic Room.

Ademais, as artes visuais terán especial protagonismo e, durante a celebración do FEC, o malagueño Azael Ferrer e a lucense VJ Caskbel acompañarán cos seus audiovisuais as sesións en Santa Margarida. Pecha o cartel do FEC 2022 Saraiba, representante do talento das novas fornadas.