Este mércores, a Xunta de Goberno Local aprobou a licitación das obras de humanización da rúa Ramón de la Sagra, que reforza as accións do Plan de barrios 2025-27 nesta parte do Ensanche, onde o Concello investirá 357.000 euros.

O obxectivo, tal e como explicou a alcaldesa, Inés Rey, é actuar no conxunto da rúa para mellorar a súa accesibilidade peonil e gañar espazos públicos que permitan reverdecer o percorrido con novas árbores. Isto será posible grazas ao actual ancho da calzada, que facilitará a ampliación das beirarrúas sen que isto teña impacto na circulación do tráfico nin no estacionamento.

As obras tamén permitirán unificar a imaxe do percorrido peonil que conecta coa contorna de Alfonso Molina, onde está en execución a renovación das beirarrúas entre Fernández Latorre e José Cornide.