A exposición conmemora o 150 aniversario do nacemento do arquitecto e urbanista orixinario do Porriño e o seu legado, recollendo obras e proxectos fora de Madrid, maioritaria e fundamentalmente en Galicia. Nesta, reflíctense as dúas vertentes que Palacios seguía no seu traballo, o clasicismo e o coñecemento da nova arquitectura.

A visita foi guiada por Ricardo Sánchez Lampreave quen, ademais de subdirector e docente da Escola Técnica Superior de Arquitectura na Universidade da Coruña, comisariou dita exposición xunto ao doutor José Varela Alén, baixo a organización do Colexio Oficial de Arquitectos de Madrid, a Fundación Arquitectura COAM e o Concello de Madrid.