Uso de cookies nas páxinas web do Concello da Coruña

Nas páxinas web municipais utilizamos cookies propias e de terceiros para mellorar os nosos servizos mediante a análise dos seus hábitos de navegación. Se continúa navegando, consideramos que acepta o seu uso. Pode obter máis información, ou coñecer como cambiar a configuración, na nosa páxina de "Normas de uso".

Concello da Coruña

  • Compartir
  • Engadir ao meu móbil | 
  • Imprimir

Cando:

30 de abril de 2020

Os Museos Científicos incrementan o seu impacto nas redes sociais durante o confinamento

Mañá subirán un vídeo que amosa por vez primeira imaxes submarinas das focas do Aquarium Finisterrae

Desde o inicio do confinamento, as instalacións da Casa das Ciencias, Domus e Aquarium Finisterrae permaneceron pechadas, polo que as súas actividades presenciais tiveron que se suspenderen. Pero a divulgación científica que identifica a estes museos continuou a través das redes sociais, que se converteron na súa principal fiestra ao mundo. Desde estas plataformas propoñen a diario lecturas, actividades, experimentos, vídeos sobre o coidado dos animais do Aquarium ou observacións astronómicas sinxelas, todo para facermos desde a casa.

Por exemplo, a conta de Twitter (@mc2coruna) multiplicou por catro a súa actividade desde o comezo do confinamento e isto triplicou o número de interaccións por parte do público e duplicou o ritmo de incorporación de novas e novos seguidores. Nese período, as visitas ao perfil da institución tamén se multiplicaron por catro.

En Facebook (@casaciencias) obsérvase un incremento de máis do 10% no número de seguidoras/es, e algunhas publicacións concretas duplicaron o seu alcance medio da actividade da conta, con datos de audiencia próximos ás 40.000 persoas. Entre as publicacións con maior aceptación destacan as gravacións no tanque grande do Nautilus, as sesións do planetario e todo o relacionado coas focas.

Imaxes submarinas das focas

Nestas semanas as focas convertéronse nas mellores embaixadoras do Aquarium Finisterrae. Para amosaren mellor a vida destes animais, procedentes doutros zoolóxicos ou nacidos nas propias instalacións, o equipo de biólogas/os que as atende gravou varios vídeos en 360º con imaxes submarinas da piscina que ocupan. As tomas revelan aspectos do seu comportamento que non se poden apreciar desde a superficie, como a súa grande axilidade baixo a auga. Mañá, 1 de maio, publicarán o primeiro deses vídeos nas redes sociais dos Museos Científicos.

Sesións do planetario a domicilio

O planetario da Casa das Ciencias tamén trasladou a súa programación ás redes a través de dúas iniciativas. Por unha parte, «O Planetario na casa» ofrece vídeos curtos co fin de aprendermos e desfrutarmos da observación astronómica. Estas pezas foron creadas con Stellarium, unha aplicación gratuíta e aberta que permite recrear o ceo como se estivésemos nunha sesión do planetario. Por outra banda, as populares sesións do último sábado de mes realízanse agora mediante un directo en Facebook, en que o colaborador Borja Tosar ofrece a súa habitual «Postal planetaria». A sesión complétase cunha publicación dunha guía para observarmos o máis relevante do ceo nocturno do mes, que está dispoñible na páxina web dos Museos Científicos (www.casaciencias.org).

Que che parece esta sección?

-101-101-101

Tes un navegador demasiado antigo!

Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible

Iniciar sesión