Este programa inclúe, un ano máis, accións de carácter preventivo, de promoción e participación social dirixidas a maiores de 55 anos. Estas accións desenvólvense nos centros cívicos municipais.

O programa ten como obxectivos a promoción de hábitos saudables para a prevención da fraxilidade, da deterioración física, cognitiva e de saúde asociados á idade.

Preténdese promover un envellecemento activo e saudable e unha mellora da calidade de vida, prestándolle unha especial atención ao contexto social e á comunidade, fomentando a comunicación, a participación e as relacións sociais.

No programa de Envellecemento activo realízanse talleres relacionados con:

• Promoción de hábitos saudables (paseos urbanos, ximnasia de lombo, ximnasia de solo pélvico, en forma bailando...)
• Prevención da fraxilidade (Ximnasia adaptada para mellora do equilibrio e prevención de caídas, Técnicas e exercicios para mellora do soño, Ximnasia relaxante e prevención da ansiedade...)
• Promoción da capacidade cognitiva, novas tecnoloxías e participación social (Iniciación á realización de trámites en liña, Internet...)

A inscrición para os talleres realizarase do 22 ao 26 de setembro nas conserxerías dos centros cívicos nos que se desenvolven. A adxudicación de prazas será por orde de inscrición.

No documento adxunto pódense consultar as accións do programa e os centros cívicos nos que se van levar a cabo no último trimestre do ano 2023, as datas e os horarios de realización, a modalidade de inscrición e o número de prazas.