Corochas é un espectáculo de Xarope Tulú de pequeno formato dirixido á primeira infancia que combina a narración oral, a manipulación de obxectos e a música.

A través do conto acumulativo, da canción e xogo de imitación permite poder viaxar  por diversas paisaxes e coñecer  personaxes estrafalarias que deben resolver múltiples enredos.

Corochas, cachogas, celigras, cóchegas, coscas, deligras ou cóxegas. Esa sensación que experimenta alguén ao lle seren tocadas levemente certas partes do corpo e que se manifesta nun riso involuntario.

Os contos ás veces son coma as corochas, fannos viaxar a lugares onde normalmente non chegamos ou a partes do corpo ás que non lles poñemos atención.

Xarope Tulú é unha compañía comprometida coas linguaxes escénicas dirixidas á infancia e a mocidade, que convida a viaxar por mundos singulares.

Atenea García é actriz, creadora escénica e narradora oral e titulada en Arte Dramática pola ESAD de Galicia. Fundou, xunto ao músico e escenógrafo Nicolás Zamorano, a compañía Xarope Tulú, dedicada ao público infantil e xuvenil. .