O Servizo Municipal de Deportes do Concello da Coruña oferta, para escolares dos centros educativos públicos da cidade, o programa Natación Escolar , co fin de lles posibilitar ás e aos escolares da cidade unha aprendizaxe significativa no medio acuático e unha mellora das súas técnicas de nado. O programa desenvólvese durante o curso escolar, nunha sesión semanal dentro do horario extraescolar, nas seguintes instalacións:

• Piscina Municipal de Riazor
• Piscina do Club do Mar de San Amaro
• Piscina do CPM de San Diego

O programa vai dirixido ao alumnado de 3.º e 4.º de primaria dos centros educativos de titularidade pública de educación primaria da cidade da Coruña.

OBXECTIVOS

• Favorecer o desenvolvemento integral do alumnado a través do medio acuático.
• Conseguir a familiarización e adaptación do alumnado ao medio acuático.
• Contribuír ao proceso de educación e integración do alumnado.
• Utilizar a auga como medio de recreo, co fin de xerar diversión e benestar a través do medio acuático e o movemento.
• Desenvolver aspectos físicos, psíquicos e de relación social do individuo, coa finalidade de mellorar a calidade de vida.
• Desenvolver as habilidades psicomotrices do alumnado, así como xerar hábitos de vida saudables a través do movemento e o exercicio físico.
• Crear hábitos correctos de hixiene diaria.  Mellorar a condición física xeral do alumnado.