O Aquarium Finisterrae despide a un dos seus habitantes máis emblemáticos, o quenlla touro Gastón. A súa impoñente elegancia e a fortaleza que transmitía cativou aos miles de persoas que visitaron a sala Nautilus no acuario coruñés. A súa presenza logrou transformar o temor en admiración, sementando o respecto polos grandes depredadores oceánicos.

Gastón naceu nas frías augas da costa surafricana e chegou con 3 anos de idade ao Oceanópolis, o acuario de Brest. Cando alcanzou 180 cm de lonxitude e 50 kg, os problemas de convivencia con outros exemplares da súa especie fixeron que os seus coidadores buscasen un lugar onde trasladalo, e así chegou ao Aquarium Finisterrae, en febreiro de 2006. Aquí viviu estes últimos 20 anos, chegando a medir máis de 2 metros e medio de lonxitude e alcanzando unha idade duns 30 anos. En estado salvaxe esta especie adoita vivir uns 15-20 anos.