O público asistente poderá participar nunha ducia de talleres, nos que profesorado e alumnado da universidade abordarán cuestións da nosa contorna máis cotiá:

• Que ten un peixe no seu estómago?
• A selva do mar. O mundo das algas e como se adaptan a distintos hábitats.
• A herdanza xenética. Onde está o ADN, como se transmite a través das xeracións, e cales son as entidades físicas que levan a información xenética.
• Microbioloxía cotiá. Sabes que os microorganismos nos rodean día a día, que nos alimentan e ata nos curan?
• Camiñando sobre a auga. O comportamento peculiar da superficie dos líquidos. Como algúns insectos poden sosterse sobre a superficie da auga, e os surfactantes como perturbadores das superficies dos líquidos.
• A raíña escondida. Aprenderemos a distinguir a avespa velutina da avespa común. Poderemos ver como é o seu ciclo de vida, os seus niños complexos e como este insecto supón un problema importante nalgúns concellos.
• Xogando coa química. Como se forman os sólidos? Como se producen cambios de cores nunha solución química?
• De que está feita a vida? Que son as biomoléculas? Onde se atopan? Cantas hai?
• Comunicación a través da mirada. A importancia da comunicación aumentativa e alternativa. Como te podes comunicar a través dun taboleiro.
• A linguaxe das bacterias. Como se comunican as bacterias? Por que adquiren resistencia aos antibióticos?
• Quen vive no fondo do mar? Recoñecemento de diferentes especies mariñas e as súas adaptacións ao medio.
• Enredando coas matemáticas. Diversos obxectos que permiten analizar as propiedades dalgunhas curvas, superficies ou outras figuras.