O programa educativo municipal XXXV Mostra de Teatro Escolar 2025-26 pecha a súa XXXV edición coa celebración da gala final de entrega de premios, que terá lugar o venres 12 de xuño, ás 17.30 horas, no Fórum Metropolitano.

Na gala, que estará presentada por, Mariña Pena Blanco, os grupos gañadores representarán as súas obras e recibirán os premios correspondentes (un cheque por valor de 100 € para cada un dos grupos gañadores), que serán entregados polo concelleiro de Educación, Formación e Innovación Tecnolóxica, Juan Ignacio Borrego Vázquez. Tamén se entregarán as mencións especiais do xurado.

Todas as obras teatrais serán valoradas (pola súa orixinalidade ou adaptación do texto, a escenografía, o vestiario, a calidade, corrección e fluidez lingüística, a dramatización e a coordinación do grupo) por un xurado composto por:

• Ana Judel Prieto, técnica de Educación do Concello da Coruña. Foi docente de grupos de teatro escolar, directora do Fórum Metropolitano e programadora de teatro infantil e xuvenil.
• Ramiro Neira Cortés, actor e narrador de tradición oral; director e produtor de proxectos teatrais en Galicia; docente de grupos de teatro escolar e afeccionado.
• Xosé Leis Martínez, graduado en Pedagoxía Teatral e máster en Estudos Teatrais e Audiovisuais da UdC; actor de teatro e audiovisual; director e programador de festivais teatrais; docente de grupos de teatro escolar.
• Ana Paz Pérez, técnica do Servizo Municipal de Educación do Concello da Coruña, como secretaria.

Programa "Mostra de Teatro Escolar"

O programa educativo "Mostra de Teatro Escolar" está concibido como un intercambio de representacións entre os grupos de teatro escolar do Concello da Coruña. Cada grupo crea (ou selecciona) e ensaia unha obra de teatro, para representala noutro centro educativo, e recibe o grupo de teatro do dito centro.

Nesta XXXV edición do programa, realizáronse un total de 14 representacións noutro centro de intercambio (e outras tantas no propio centro), entre o 13 de abril e o 14 de maio de 2026, en 12 centros educativos da cidade. En total, participaron 14 grupos, con 278 alumnos/as de educación infantil, educación primaria, ESO e bacharelato, así como 32 profesores/as, monitores/as e acompañantes.