A Casa das Ciencias renova a súa carteleira coa produción «A grande aventura do sistema solar», un programa do planetario a toda cúpula para público familiar e cunha duración de vinte e cinco minutos.

Os personaxes desta película inmersiva, encabezados polo gran Schiaparelli, intérnanse nunha viaxe polo noso sistema solar, formado polo Sol, oito planetas e millóns de obxectos máis pequenos. Contemplarán paisaxes sorprendentes, sentirán ventos tempestuosos e, como non, sortearán algúns perigos. Dende a superficie abrasadora de Venus ata o xélido Urano, pasando por Marte ou os finos aneis de Saturno, esta aventura acabará revelando o precioso e especial que é o noso planeta Terra.

O primeiro pase terá lugar o venres 31 de outubro ás 18.00 horas. A partir do 1 de novembro incorpórase á carteleira das fins de semana nas sesións das 13.00 horas e das 17.00 horas.

«A grande aventura do sistema solar» é unha produción de NSC Creative, un estudo británico especializado en desenvolver experiencias inmersivas que recibiu premios por esta película en Alemaña, nos Estados Unidos, Australia, Eslovaquia, a República Checa, Corea do Sur e o Reino Unido.

Coa subvención da Consellería de Cultura, Lingua e Xuventude, da Xunta de Galicia