Chévere inicia un proxecto que vai modificar algunhas das chaves do seu traballo, tratando de cuestionar o seu propio modus operandi para seguir desbordando os límites e as estratexias máis repetitivas e canónicas das prácticas actuais de teatro documento. Un proxecto que se afasta das historias máis ou menos locais e da mirada xeracional, pero que mantén o interese por narrar desde as zonas de fricción entre a memoria colectiva e os relatos oficiais, mantendo a metodoloxía de traballo e as tácticas de creación.

Todo comeza ao descubrir os textos e o activismo político de Helen Keller, unha muller norteamericana, colocada fóra da normatividade dende os dezanove meses de vida, ao quedar xorda e cega por unha enfermidade, e que se converteu nunha celebridade mundial ao ser a primeira persoa xordocega en obter un título universitario en 1904. A súa vida foi fixada na memoria colectiva como un exemplo de superación e a maioría dos seus escritos acabaron rescatados como simples aforismos motivacionais. Por iso faise necesario rescatar a dimensión crítica da súa vida, porque ela é un exemplo de disidencia anticapitalista, que desborda a lóxica do milagre americano ao colocarse do lado dos máis vulnerables, contra a guerra e a explotación, militando en organizacións socialistas e revolucionarias nun país que fixo da loita contra o comunismo unha razón de ser.

Por tanto, este é un proxecto sobre a rebeldía e a disidencia. Sobre mulleres rebeldes e disidentes que romperon o silencio social. Pero este tamén é un traballo sobre a linguaxe, que quere cuestionar a in-comunicación entre persoas ouvintes e non ouvintes, entre persoas normais e persoas diferentes, integrando na mesma obra a lingua falada e a lingua de signos.

Con Patricia de Lorenzo, ÁngelavIbáñez, Chusa Pérez

Dramaturxia e dirección: Xron

Unha coproducción de Chévere, Centro Dramático Nacional e Teatre Lliure

Venda de entradas 

Despacho de billetes da praza de Ourense: de luns a venres das 11.00 ás 15.00 h e das 16.30 ás 19.30 h

Despacho de billetes do Teatro Rosalía: só abre os días de función das 16.00 ás 20.00 h

Venda en liña

* Programación para persoas adultas. Idade recomendada a partir de 14 anos

* Unha vez que comece o espectáculo non se permitirá acceder á sala.