Na Casa das Ciencias a principal novidade é o sistema de proxección do planetario, que está en pleno proceso de renovación e que permitirá a partir de outubro gozar dunha experiencia con maior resolución e imaxes máis reais para trasladar o público a outros planetas ou viaxar pola Vía Láctea e o resto do universo a través dos diversos programas que se ofrecen.

Ademais, nas plantas de exposición atoparán novos módulos interactivos, como a «frauta de pan» para experimentar con sons percusivos orixinados no fondo sonoro da propia sala, ou o que convida a construír con pezas un arco que se sostén en por si.

A Domus presenta o ámbito expositivo ¡Próbate!, que convida a reflexionar sobre a vestimenta como forma libre de expresión, e incorpora á súa carteleira de cinema «Expedición Arrecife», unha viaxe ao redor do mundo oculto dos arrecifes de coral. A oferta complétase coa ampla proposta de talleres do Laboratorio Aberto e a sala maker@domus.

O Aquarium Finisterrae presenta dúas interesantes novidades. A primeira delas é un itinerario sobre biodiversidade que, a través de varios módulos da Sala Maremagnum, introduce con exemplos concretos algúns dos conceptos fundamentais relacionados con este tema. A segunda é unha visita temática guiada á Sala Nautilus para centros que programen nos seus clubs de lectura a obra de Jules Verne «20.000 leguas de viaxe submarina».

Ademais, o Aquarium Finisterrae lanza unha chamada para os centros que queiran colaborar coa futura renovación da sala Maremagnum enviando preguntas do alumnado relacionadas coa crise ambiental que vivimos, especialmente no que afecta ao medio mariño. O profesorado que aborde estes temas na aula e envíe as preguntas do seu alumnado será obsequiado cun póster didáctico do Aquarium Finisterrae.

Os grupos escolares gozan de tarifas reducidas para o acceso aos Museos Científicos. No caso dos centros educativos do municipio da Coruña a entrada é gratuíta.

A información completa, o procedemento para solicitar unha visita e o formulario de solicitude están dispoñibles nesta páxina de .. Visitas escolares