Modulartec, na súa sétima edición deste festival de música electrónica, recupera as sesións Vortex que se iniciaron en 2018 no Planetario da Casa das Ciencias, pero esta vez potenciadas polos novos proxectores dixitais que permiten a creación de visuais en tempo real.

MDLRTC VORTEX preséntase como unha homenaxe ás sesións experimentais que naceron en 1959 no Morrison Planetarium de San Francisco, proxecto multimedia pioneiro no que a música electrónica e a creación visual en directo atopáronse por vez primeira baixo a cúpula inmersiva dun planetario. A primeira sesión deste novo ciclo estacional terá como protagonista a un dj set en vinilo de Fatfish e coas visuais a cargo de Jose Manuel Saudinos.

Fatfish é un coleccionista de discos e selector con máis de 30 anos na escena como dj e promotor, responsable de Discorder, a mítica tenda de Madrid de música electrónica e de vangarda durante os anos 90 e os 00, habitual de clubs nacionais e internacionais, así como en festivais de prestixio. Actualmente dirixe o encontro de síntese modular da Coruña, Modulartec.

Jose Saudinos é un creador madrileño e autodidacta por convicción, cuxa carreira creativa é ampla e polifacética dada a súa capacidade innata para adaptarse ao novo mediante a exploración constante e a aprendizaxe continua.