Este sistema só pode aplicarse unha vez que transcorresen dous anos desde a aprobación definitiva do plan detallado que ordena o polígono. Se a iniciativa é pública, o municipio debe seleccionar a oferta máis adecuada a través do concurso. Se a iniciativa é privada, a proposta dos particulares deberá constar dos documentos previstos no art. 162.2 da Lei 9/2002 (proposición xurídico – económica con compromisos, garantías e prazos, condicións económicas dirixidas aos propietarios do chan e anteproxecto de urbanización detallado.)

Se transcorridos dous meses a administración non desestima esta solicitude, procederase a tramitar un procedemento de concorrencia coas seguintes peculiaridades:

1. Durante un mes poderanse presentar melloras ou alternativas á iniciativa formulada
2. O Concello elixirá a proposta máis adecuada aos intereses públicos outorgándolle un título concesional onde figuren cláusulas, obrigacións e dereitos do concesionario.
3. O urbanizador obterá a contraprestación ao seu labor á conta dos propietarios, en terreos edificables ou en metálico, nos termos establecidos na concesión, ben a través do reparcelamento ou mediante o cobro de cotas de urbanización.

O urbanizador, que non ten que ser propietario, denominado axente urbanizador ou concesionario realiza as obras de urbanización e efectúa a equidistribución obtendo unha retribución pola devandita execución ben con terreos edificables no polígono mediante o reparcelamento ou ben en metálico, segundo conviñesen co municipio e nos termos establecidos na concesión, con arranxo ao art. 164.3 da Lei 9/2002.