O 12 de agosto de 2026 producirase unha eclipse de Sol total no que A Coruña terá un especial protagonismo. Por este motivo, os Museos Científicos Coruñeses en colaboración co festival de cómic «Viñetas desde o Atlántico» organizan unha exposición de autores e autoras locais para celebrar este fito histórico.

Os obxectivos desta mostra son a divulgación científica con perspectiva histórica e social da influencia e importancia das eclipses ao longo da historia da humanidade, a través dun medio de comunicación visual e adaptado a todas as idades, o cómic. Unha maneira de democratizar a ciencia e facela asimilable e próxima para todos os públicos.

Dez nomees consolidados do cómic, vinculados á cidade da Coruña, abordan con obras orixinais diferentes aspectos específicos ao redor das eclipses. A súa influencia na sociedade, na arte e na cultura e os avances que a ciencia fixo no ámbito da investigación deste fenómeno astronómico, teñen cabida neste proxecto deseñado para divulgar a través do entretemento.

Conforman a selección de firmas Xulia Vicente, Luís Yang, Uxía Larrosa, Marcos Calo, Xulia Pisón, Diego Burdío, Paula Mayor, Jorge Peral, Paula Esteban. A mostra complétase cun invitado especial, Jordi Bayarri, autor valenciano de cómic especializado en BD científica con biografías en cómic de personalidades como Isaac Newton, Galileo Galilei, Albert Einstein, Aristóteles ou Marie Curie entre moitas máis. Unha selección de luxo e rica en estilos e enfoques que, sen dúbida, atraerá a atención dos diferentes públicos.

A exposición poderá visitarse desde o 3 de xullo ata o 27 de setembro de 2026.