A sala Isabel Castelo do Aquarium Finisterrae presenta a exposición «Fotógrafos da Natureza 2020, coas fotografías premiadas na última edición do concurso GDT European Wildlife Photographer of the Year.

Este concurso iniciouse no ano 2000, promovido pola Asociación alemá de Fotógrafos da Natureza (GDT nas súas siglas en alemán). Ten como obxectivo mostrar o extraordinario nivel da fotografía da natureza, tanto profesional como afeccionada, en Europa, pero tamén pretende promover o seu coñecemento e a súa conservación.

O gañador absoluto deste ano é o fotógrafo español Eduardo Blanco Mendizábal, cunha imaxe dun lince.

A exposición contén 84 imaxes, gañadoras e finalistas nas diferentes categorías do concurso: Aves, Mamíferos, Outros animais, Eloxio das plantas, Paisaxes, Mundo submarino, Ser humano e natureza, Forma e composición, Mozos/as fotógrafos/as.

Estas imaxes foron elixidas entre as miles que se presentaron este ano ao concurso, realizadas por fotógrafos e fotógrafas de toda Europa.

Son instantáneas que foron realizadas con moita paciencia e persistencia, nas que, unha vez máis, os autores e autoras despregan as súas habilidades e a súa mirada para capturar aspectos esenciais e sorprendentes da natureza, xa sexan paisaxes ou pequenos detalles das especies que os habitan. Desde a premisa que di que protexemos o que coñecemos, imaxes como as desta exposición poden ser un bo punto de partida para concienciarnos e involucrarnos na conservación da natureza.