O Planetario da Casa das Ciencias incorporou un novo programa á súa carteleira, Dinosaurios: una historia de supervivencia, un audiovisual que achega a historia natural ao público familiar (maiores de 6 anos) e que se poderá ver a partir do venres 8 de abril na sesión das 18.00 horas.

Esta produción cinematográfica combina a animación tradicional co 3D fotorrealista nunha viaxe apaixonante e divertida conducida por Celeste, unha nena curiosa e inquieta que nos convida a descubrir grandes misterios da ciencia.

Como a case todos os nenos e nenas, a Celeste fascínana os dinosauros. Está a prepararse para falar na clase sobre a súa extinción cando Moon, un máxico personaxe repleto de sabedoría, lle expón unha dúbida: E se che dixese que aínda quedan dinosauros entre nós? Celeste acompañará a Moon nunha viaxe no tempo. Unha apaixonante aventura que os levará a visitar a Terra nun pasado moi, moi, remoto. Verán fascinantes transformacións que acompañaron a estes seres durante millóns de anos creando criaturas xigantes, seres acoirazados e super depredadores, ata o día no que o grande impacto provocou unha extinción masiva na Terra. Pero non todo está perdido. Celeste descubrirá a clave da súa supervivencia.

Dinosauros: unha historia de supervivencia é unha produción de Render Area, coa participación do estudio de animación Monigotes Estudio 2.0, cunha ampla experiencia en longametraxes de animación.

Conta coa colaboración do Ministerio de Ciencia e Innovación a través da FECYT (Fundación Española para a Ciencia e a Tecnoloxía) e a participación dos principais planetarios a nivel nacional, incluído o da Casa das Ciencias da Coruña.