O pasado 6 de setembro a Domus e o Aquarium Finisterrae recibiron a visita de medio cento de estudantes de secundaria de España, Polonia e Brasil, que realizaron gravacións para un documental cuxo tema central é a relación do cambio climático coa xenética e a saúde. Ademais das localizacións nos Museos Científicos Coruñeses, realizáronse gravacións no hatchery da confraría de mariscadores do Freixo e o laboratorio de farmacoxenética do CIMUS da Universidade de Santiago de Compostela.

O estudantado seleccionado formouse previamente no campus Climántica (plataforma educativa sobre o cambio climático) para a súa integración na produción do documental, cuxo resultado levará ás aulas a través dun libro de texto, unha guía didáctica e materiais de alfabetización cinematográfica documental e de ciencia escolar experimental.

Ademais dos socios escolares, este proxecto conta no consorcio con catro universidades: a Universidade de Santiago de Compostela, que lidera o proxecto a través do seu coordinador xeral, o Dr. Ángel Carracedo; a Universidade de Aveiro (Portugal), a través de Fábrica Centro de Ciencia Viva; a Universidade de Bolonia (Italia); a Universidade de Iasi (Romanía); e os Museos Científicos do Concello da Coruña, coordinados dende a Domus.