As achegas previstas no presente Plan Estatal destínanse ao mantemento das axudas de subsidiación de préstamos convidos concedidas ao amparo de plans estatais anteriores e á concesión de novas subvencións para a rehabilitación de edificios e vivendas e a rexeneración e renovación de áreas urbanas e rurais, incluídos os supostos de infravivenda e chabolismo; para facilitar o acceso á vivenda en réxime de aluguer a sectores de poboación con dificultades económicas; para axudar a quen sexa obxecto de desafiuzamento ou lanzamento da súa vivenda habitual; así como para o fomento da promoción e/ou rehabilitación de edificios de vivendas destinadas ao aluguer ou a persoas maiores ou con discapacidade. As citadas achegas destínanse tamén á concesión de novas subvencións para axudar aos mozos, con escasos recursos económicos, no seu acceso á vivenda, xa sexa en aluguer ou mediante adquisición.

A concesión das novas subvencións rexerase polo disposto neste real decreto e nas disposicións que poidan ditarse no seu desenvolvemento ou execución, así como polo establecido na Lei 38/2003, de 17 de novembro, Xeneral de Subvencións, no regulamento que a desenvolve, e na normativa autonómica que, en cada caso, resulte de aplicación.

Os convenios para subscribir para o desenvolvemento do Plan axustaranse, en todo caso, ao disposto no título preliminar, capítulo VI da Lei 40/2015, de 1 de outubro, de Réxime Xurídico do Sector Público.