O sábado 30 de novembro terá lugar na sala Leonardo da Vinci da Domus unha dobre sesión do «V Encontro da noite», xornada divulgativa sobre contaminación lumínica, preservación da escuridade natural nocturna e posta en valor do patrimonio ambiental e cultural da noite.

A xornada comezará ás 18.00 horas coa intervención do cronobiólogo Juan Antonio Madrid. Na súa charla, titulada «Ritmos biolóxicos nun mundo sen noite», explicará o papel da luz e a escuridade, do día e a noite, en suma, na fisioloxía e a saúde humana.

A continuación, ás 19.00 horas, a astrofísica Eva Villaver ofrecerá a charla titulada «Escrito nas estrelas», na que explorará a nosa fascinación polo ceo nocturno e o coñecemento que podemos obter da súa observación.

Juan Antonio Madrid é profesor honorario da Universidade de Murcia, investigador do Laboratorio de Cronobioloxía (Cronolab) da Universidade de Murcia e director científico da spin off Kronohealth SL. É académico de número da Academia de Ciencias da Rexión de Murcia e autor do libro Cronobiología, editado por Plataforma Editorial.

Eva Villaver é astrofísica, investigadora no campo da evolución dos sistemas planetarios e o final da vida das estrelas. Foi directora da Oficina Espacio y Sociedad da Axencia Espacial Española ata setembro de 2024, cando foi nomeada subdirectora do Instituto Astrofísico de Canarias. Ademais escribiu o libro Las mil caras de la Luna, editado por Harper Collins.

Na sesión presentarase tamén un novo moníptico sobre contaminación lumínica editado pola Agrupación Astronómica Coruñesa Ío.