A baía coruñesa converterase por primeira vez no escenario do Campionato de España de Windsurfer, unha cita deportiva de primeiro nivel organizada polo Club Náutico da Coruña que reunirá na cidade a arredor de 60 regatistas procedentes de distintos puntos do país, así como de Francia, Italia, Portugal e Australia.

A competición desenvolverase entre os días 1 e 3 de maio e contará cun total de nove probas, incluíndo unha de longa distancia que percorrerá a totalidade da ría. O evento estruturarase en dous campos de regata, un deles situado na zona de Bastiagueiro para as probas curtas, o que permitirá tamén o seguimento desde terra por parte da cidadanía.

O concelleiro de Deportes, Manuel Vázquez, subliñou a importancia de acoller este tipo de eventos na cidade e destacou que "este campionato é unha mostra máis do potencial da Coruña para albergar competicións deportivas de primeiro nivel, aproveitando un entorno natural único como é a nosa baía". Ademais, sinalou que "seguimos a traballar para impulsar o deporte e posicionar a cidade como referente tamén no ámbito náutico".

A cita contará coa presenza de deportistas destacados como o actual campión nacional, Joan Roig, así como Pilar Prieto e Eduardo Navarro, entre outros participantes de relevancia. Ademais, haberá unha ampla representación galega, con sete regatistas do club organizador .

Desde o Goberno municipal ponse en valor a celebración deste tipo de competicións, que contribúen a dinamizar a actividade deportiva e económica da cidade, ao tempo que proxectan a imaxe da Coruña como unha cidade aberta ao mar, activa e preparada para acoller eventos de ámbito estatal e internacional.

A entrega de premios terá lugar o día 3 de maio, poñendo o broche final a tres xornadas nas que a baía coruñesa se converterá no epicentro do windsurf estatal.