A Coruña acolle esta fin de semana un seminario técnico organizado polo Comité Nacional de Fútbol Sala da Real Federación Española de Fútbol (RFEF), no que participan 110 árbitros e árbitras das principais competicións nacionais: Primeira División, Primeira División Feminina e Segunda División.

O encontro reúne na cidade ao colectivo arbitral das máximas categorías do fútbol sala español para preparar a nova tempada, unificar criterios técnicos e compartir sesións de formación.

O concelleiro de Deportes, Manuel Vázquez, participou na apertura do seminario en representación do Concello e deu a benvida ás persoas asistentes.

"É unha satisfacción que A Coruña acolla un encontro desta relevancia para o fútbol sala español", sinalou Vázquez.

O edil destacou tamén o papel do colectivo arbitral no desenvolvemento das competicións. "O voso traballo é fundamental para garantir o respecto, a igualdade e o xogo limpo", afirmou.

Manuel Vázquez agradeceu ao Comité Nacional de Fútbol Sala a elección da cidade como sede deste seminario e reiterou o compromiso do Concello coa organización de eventos deportivos de ámbito estatal.

A celebración deste encontro reforza a aposta do Goberno de Inés Rey por consolidar A Coruña como sede de congresos, competicións e citas deportivas de referencia, contribuíndo á proxección da cidade e ao impulso da súa actividade deportiva.