A alcaldesa, Inés Rey, supervisou esta mañá o resultados das obras de reurbanización da rampla do Matadoiro que, a falta de pequenos detalles, xa están completada, mellorando a accesibilidade na contorna e sumando novas zonas verdes e espazos peonís. A actuación, financiada con fondos Next Generation, supuxo un investimento superior ao medio millón de euros. Rey estivo acompañada pola concelleira de Infraestruturas e Mobilidade, Noemí Díaz.

"Desde o Goberno municipal continuamos creando espazos de calidade nos nosos barrios grazas ás diferentes convocatorias de fondos europeos ás que nos presentamos e que nos permiten mellorar a calidade de vida da cidadanía", indicou a alcaldesa, que tamén destacou que A Coruña foi a primeira cidade de España en investimento por habitante na segunda convocatoria de fondos Next Generation, obtendo o total das achegas solicitadas.

A remodelación deste enclave próximo ao Paseo Marítimo consistiu nun formato de plataforma única, que permitiu a ampliación das zonas de tránsito peonil e gañar en accesibilidade. Os traballos leváronse a cabo, concretamente, no treito comprendido entre a propia rúa da Rampla do Matadoiro -partindo desde a contorna do Paseo Marítimo- e ata o paso peonil que hai na confluencia coa rúa Adelaida Muro. Desta forma, renovouse unha superficie de máis de 1.700 metros cadrados, unha actuación que, ademais de incluír a ampliación das beirarrúas, tamén contemplou a reconfiguración dos pasos peonís da Rampla do Matadoiro e o cruzamento con Adelaida Muro, que pasou a ser en elevación, co obxectivo de reforzar a seguridade peonil. A vindeira semana quedará completada a actuación coa colocación dunha varanda que mellorará aínda máis a seguridade.

Ademais, tamén se adecuou a vía que habilita o acceso e saída ao aparcadoiro do hotel Meliá María Pita, lindeiro á propia rúa da Rampla do Matadoiro. En paralelo, renovouse a rede de saneamento e o sistema de iluminación pública. Tamén se plantou arboredo e foron creadas máis áreas verdes aproveitando os espazos públicos das proximidades, así como novo mobiliario urbano.