Este mércores aprobouse en Xunta de Goberno Local a saída a concurso dos postos da planta baixa do interior do mercado municipal de San Agustín que ou ben están baleiros ou en réxime de ocupación temporal.

O Concello licita 23 lotes a 15 anos, coa posibilidade de prorrogalos por ata dez anos máis. O obxectivo, tal e como explicou esta mañá a alcaldesa, Inés Rey é dobre: por unha banda, facilitarlle espazos ao pequeno comercio para a venda de produtos frescos e de proximidade e, por outra, incentivar a explotación e uso das instalacións no interior do mercado, que nos seus postos exteriores xa está ao 100% da súa capacidade, coa meirande parte dos postos abertos e con outros dous a piques de facelo.

As ofertas para optar a estes 23 postos da planta baixa no interior do mercado poderán presentarse nos vindeiros días por vía electrónica, unha vez que se publiquen as bases no Boletín Oficial da Provincia (BOP).

Como xa é habitual, o Concello informará ao respecto nas canles oficiais da apertura do prazo, que será de 30 días hábiles.