O Coliseum lembrará os mellores momentos da música dos 80 co show "Yo fui a EGB. La gira!".  O espectáculo ofrecerá un único show en Galicia o vindeiro 25 de marzo de 2023 na cidade da Coruña. Unha viaxe por pequenos e grandes recordos, cos que os asistentes cantarán ao ritmo dos grandes éxitos da época dos 80, nun espectáculo de mais de 5 horas de duración. As entradas sairán á venda mañá mércores, 28 de decembro, ás 12.00 horas en www.ataquilla.com, www.yofuiaegblagira.com e no despacho de billetes da praza de Ourense.

O espectáculo contará con actuacións de Nacha Pop, Alejo Stivell de Tequila, Orquesta Mondragón, Vicky Larraz cos grandes éxitos de Olé Olé, Modestia Aparte, Javier Andreu (La Frontera), La Guardia, Javier Ojeda (Danza invisible), os mellores tributos (Grease, Queen, Dirty Dancing, Michael Jackson), a actuación especial de Dj do Dream Team e a presentación de Corbacho.

O show, que tivo como xerme o grupo de Facebook creado polos bilbainos Javier Ikaz e Jorge Díaz, ao que seguiron libros, discos e festivais musicais, réndenlle tributo a unha xeración nostálxica e ata fetichista ao redor da EXB, unhas siglas que aluden á Educación Xeral Básica, a etapa do sistema escolar que agrupaba nenos e nenas desde 6 ata os 14 anos.