Mañá, domingo 21, os Mercados Ecolóxicos Municipais volven ao Campo da Leña, onde está previsto que máis de 20 firmas asociadas a comercios e produtores de proximidade habiliten os seus postos de venda de 10.00 a 15.00 horas.

En paralelo, o Concello, a través da Área de Fomento e Promoción da Cidade, ofrecerá un amplo abano de actividades para todos os públicos. Das 10.00 ás 15.00 horas, nun formato de continuidade, haberá un espazo de dinamización infantil e un posto dos desexos, dúas iniciativas orientadas ao goce das e dos máis pequenos.

Ademais, a rapazada tamén poderá participar nun obradoiro creativo de maracas que terá lugar entre as 11.30 e 12.30 horas, tamén no Campo da Leña. A asistencia será de balde ata completarse o máximo da capacidade prevista, 15 prazas para as nenas e nenos. A inscrición habilitarase desde as 10.00 horas no propio mercado.

Xa a posteriori, das 12.30 ás 13.30 horas, terá lugar o coloquio informativo 'Descubrindo o cicloturismo: por que todos teriamos que facer unha viaxe en bici?', da man de Iria Prendes. Esta iniciativa lévase a cabo da man da asociación Mobi-liza, co obxectivo de avanzar en materia de concienciación para coa cidadanía no referente á mobilidade sostible na paisaxe urbana. A asistencia á charla será de balde.

O cronograma definitivo da xornada será, pois, o seguinte:

• Das 10.00 ás 15.00 horas: espazo de dinamización infantil e posto dos desexos.
• Das 11.30 ás 12.30 horas: obradoiro creativo de maracas -con inscrición previa-.
• Das 12.30 ás 13.30 horas: coloquio informativo 'Descubrindo o cicloturismo: por que todos teriamos que facer unha viaxe en bici?', coa asociación Mobi-liza.

Así funciona o formato rotatorio dos mercados ecolóxicos municipais

Co fin de poder ofrecer e expandir os produtos ecolóxicos e de orixe ética e local ao maior número de persoas, o Concello está a lle dar continuidade ao novo formato rotatorio dos Mercados Ecolóxicos Municipais, que estenderá este evento polos diversos barrios da cidade nos vindeiros meses.

A outra gran novidade deste formato dos Mercados Ecolóxicos Municipais é a súa realización todas as fins de semana do mes: o primeiro e o terceiro domingo, no Campo da Leña, e o segundo domingo de cada mes na praza da Tolerancia, en Labañou. Xa o último domingo do mes, o mercado vai rotando por distintos barrios, como Novo Mesoiro o Parque Europa de Catro Camiños e a praza de San Cristovo, nos Mallos. 

Neste sentido, hai dúas modalidades de mercado: o mercado ecolóxico, que é o que se realiza no Campo da Leña, e o mercado de compra sostible, correspondente ao da praza da Tolerancia e outros lugares. Os mercados do Campo da Leña están especializados en produtos ecolóxicos, que acreditan criterios éticos e sostibles na súa produción, elaboración ou materias primas. Os mercados na praza da Tolerancia, e outras localizacións, fomentan a economía circular e a compra responsable, aplicando a regra dos 4R. O obxectivo é poder ofrecer o maior número de produtos de economía sostible e actividades paralelas como obradoiros, concertos e actividades para as e os máis pequenos.

Todos os mercados se realizarán no mesmo horario, de 10.00 a 15.00 horas. A este respecto, a información relativa a cada evento pódese atopar nas redes sociais do mercado (@mercaecocoruna) e nas do Concello da Coruña.