O Concello da Coruña inicia a semana que vén as obras de mellora na rúa Santiago de la Iglesia, situada na contorna da avenida de Fisterra. Trátase dunha actuación que permitirá mellorar a accesibilidade, renovar as infraestruturas e reorganizar a circulación viaria, dando resposta ás necesidades da veciñanza da zona.

O cambio máis salientable será a habilitación dun novo xiro á esquerda desde Santiago de la Iglesia cara á avenida de Fisterra, que permitirá acceder directamente á rúa Rei Abdullah. Ata o de agora, este movemento non estaba permitido, o que obrigaba a realizar percorridos máis longos por vías alternativas. A medida atende unha demanda reiterada do barrio e suporá unha mellora notable na mobilidade diaria.

A intervención abrangue tamén a renovación dos pavimentos de beirarrúas e calzada, así como a mellora integral da rede de pluviais, coa substitución dos colectores e sumidoiros ao longo de toda a vía. Estes traballos permitirán reforzar a capacidade de drenaxe e adaptar a rúa ás necesidades actuais da contorna.

A concelleira de Infraestruturas e Mobilidade, Noemí Díaz, destacou que "actuacións como esta melloran directamente o día a día das persoas, resolvendo demandas históricas e facendo da Coruña unha cidade máis cómoda e accesible".

Esta intervención forma parte da aposta do Goberno de Inés Rey por seguir transformando os barrios da cidade con actuacións próximas, útiles e pensadas para mellorar a calidade de vida da veciñanza.