O concelleiro de Cultura e Turismo, Gonzalo Castro, presidiu esta tarde a sesión do consello reitor do IMCE na que se aprobaron os pregos de licitación do programa de Lecer cultural. O novo contrato entraría en vigor en setembro, unha vez remate o actual.. Deste xeito, o Goberno de Inés Rey actualiza este programa para "garantir a dinamización cultural nos espazos públicos para todas as idades, dando alternativas ao tempo libre da cidadanía con propostas innovadoras", indicou Castro. 

O orzamento do novo servizo de Lecer cultural será de máis de 634.000 euros repartidos en tres anualidades, de setembro a finais deste ano, e 2027 e 2028. O programa de Lecer contará con talleres nas convocatorias de outono e primavera, campamentos de Nadal e verán, talleres monográficos e sendeirismo. Desenvolverase, como ata o de agora, tanto no Centro Sociocultural Ágora como no Fórum Metropolitano. O novo contrato aportará unha maior seguridade xurídica ao persoal traballador.

Por outra banda, o Concello está ultimando o contrato ponte que permitirá retomar o programa Lecer a partir do mes de abril tras a súa interrupción por causas alleas á administración. Deste xeito, retomarase o programa de primavera cunha nova empresa responsable da súa realización mentres non se adxudica o contrato definitivo.

O consello reitor do IMCE tamén aprobou esta tarde as contas do exercicio de 2025, que finalizou cun superávit de 559.510 euros. En total, a empresa pública ingresou 11.378.691 euros o pasado ano fronte a 10.630.504 euros de gastos, ao que hai que aplicar 188.676 euros de desviacións de financiamento do exercicio.