O pasado venres 26 de xaneiro os alumnos-traballadores do Programa de emprego "Unha ventá ao porto medieval da Coruña" desprazaron o seu centro de traballo á sala municipal de exposicións "Palexco", onde se atopa a exposición da artista francesa "ORLAN: Esta é a miña historia... da arte."

Durante a xornada, ademais de visitar a mostra de arte, os alumnos-traballadores fixeron un traballo de campo que consistiu en preparar a visita guiada do espazo. Investigaron e expuxeron información sobre a artista, a súa historia e inspiración, as obras e demais aspectos relacionados.

A actividade levouse a cabo como mero ensaio do que será parte do traballo requirido no Programa de emprego que lles ocupa; ver a exposición dende unha postura de xestores culturais, afastándose da de meros espectadores, e realizar futuras visitas guiadas en diferentes espazos da cidade, que irán saíndo nos próximos meses.

A práctica realizada resultou unha toma de contacto moi interesante e enriquecedora para os membros do equipo de traballo. Serviu para aprender máis sobre a dinámica proposta e traballar nos aspectos a mellorar.