Xulio César por Nicolás Coustou, procedente do arquivo de Wikipedia.
Cando Roma chegou a Elviña
Segundo relata o senador e historiador romano Dion Casio, o propio Xulio César dirixiu unha expedición procedente de Gades (Cádiz) que chegou por mar a Brigantium, no seu período como pretor da Hispania Ulterior.
Naqueles tempos, César procuraba obter beneficio económico para financiar posteriores campañas, así como obter prestixio e crédito militar como dirixente político. Para iso, realizou sucesivos asaltos na fachada atlántica, na actual área entre Porto e o río Miño, e despois, na área de Brigantium. Así o relatou Dion Casio:
«Despois, César, facendo vir unha barcaza desde Gades, atravesou con todo o seu exército e, sen loita, someteu a todos os que estaban nunha mala situación por falta de víveres. E desde alí, navegando ao longo da costa, cara a Brigantium, cidade da Gallaecia, atemorizounos e someteu polo ruxido da súa embarcación, pois xamais viran unha escuadra».
Hoxe en día sabemos que a última afirmación de Dion Casio non é completamente certa, pois coñecemos numerosas evidencias da interacción entre os navegantes gaditanos e os habitantes das costas ártabras (polo menos, desde o século V a.C.). Con todo, é posible que o carácter desta chegada supuxese un cambio nas formas de relacionarse con eles, que anteriormente era pacífica. A pesar das súas intencións bélicas, aínda non é posible afirmar que a chegada de César provocase un verdadeiro conflito armado nesta área, mais si é posible que, dunha forma ou outra, a "visita" do carismático político romano producise un cambio paradigmático nos últimos anos de Elviña como gran poboado fortificado da Idade do Ferro.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible