A terraza máis pequena discorre ao oeste e sur, por debaixo da acrópole, e está delimitada por unha muralla de 1,5 metros de espesor. Na parte máis oriental únese coa muralla sur da acrópole, e pénsase que foi levantada nunha fase avanzada, aproveitando unha estrutura anterior.

Nela atópase un acceso de carácter monumental á acrópole: a coñecida como entrada suroeste está formada por unha rampla pavimentada e dous torreóns que a flanquean.

Do mesmo xeito que a maior parte do castro, esta zona aínda non foi totalmente escavada e descoñecemos que pode albergar no seu interior. Mantense practicamente intacta, agardando a que intervencións futuras poñan ao descuberto novas estruturas e materiais que acheguen máis información e coñecemento sobre este castro.