Con motivo da celebración do Día de Rosalía de Castro, o 23 de febreiro, a Casa das Ciencias dedicará uns minutos en todas as súas sesións de Planetario, do 19 ao 27 de febreiro, a ensinar a situar no ceo a estrela que leva o nome da escritora galega.

Para culminar esta semana dedicada a Rosalía de Castro e a estrela que leva o seu nome, programouse unha observación astronómica na terraza exterior do Aquarium Finisterrae para recoñecer as estrelas e constelacións máis típicas desta época do ano, coa colaboración da Agrupación Astronómica Ío. Será o venres 25 de febreiro se as condicións meteorolóxicas o permiten, polo que se confirmará a súa realización nos próximos días.

Ademais, repartirase entre o público asistente ás sesións de Planetario un planisferio dos dous hemisferios, norte e sur, coas constelacións en galego, editado pola Agrupación Astronómica Ío.