A Casa das Ciencias en colaboración coa Agrupación Astronómica Ío organiza para o xoves 15 de decembro, ás 19.30 horas, unha conferencia no seu planetario a cargo de Andrea Rodríguez Antón, doutora en astrofísica.

A charla, titulada «Miradas diversas ao ceo desde a astronomía cultural», consistirá nunha introdución á Astronomía Cultural e o seu papel no coñecemento das sociedades humanas. Na primeira parte recorrerase á cúpula estrelada do planetario como soporte para explicar os cambios básicos na visibilidade do ceo, para despois facer un breve repaso por diferentes lugares da historia galega nos que o ceo estaría presente no deseño e organización do espazo e a xestión do tempo.

Andrea Rodríguez Antón é doutora en astrofísica e investigadora do INCIPIT (Instituto de Ciencias do Patrimonio) de Santiago de Compostela. Tamén traballou no Instituto de Astrofísica de Canarias e outros centros de investigación. No último ano participou no asesoramento para a creación dun centro de interpretación do patrimonio histórico en Ausserd (Sahara Occidental). Na actualidade participa no medio dixital turismodeestrellas.com elaborando unha sección de divulgación sobre Astronomía Cultural.