O vindeiro venres 1 de decembro ás 19.30 h, a ilustradora Xulia Pisón presentará no planetario da Casa das Ciencias da Coruña o seu novo cómic Microalgas. Máis alá da Terra, terceira e última entrega desta triloxía de divulgación científica. Na presentación falarán tamén os asesores científicos da publicación, o astrofísico e divulgador Borja Tosar e o químico Jose Vilariño, sobre a terraformación de Marte e o potencial das microalgas na conquista do planeta vermello.

Triloxía de divulgación

Microalgas é unha triloxía de cómics que xorde como unha das actividades de divulgación científica do proxecto de investigación europeo Enhance Microalgae. Neste marco publícanse Microalgas. O mundo oculto (Universidade da Coruña, 2017) e Microalgas. O mar de Ardora (Universidade da Coruña, 2020) nos que descubrimos este mundo de microorganismos que nun futuro serán fundamentais na biotecnoloxía, farmacoloxía ou na alimentación. Os protagonistas, Spirulina, Ardora, Nanno, Tom e Wasto, son integrantes de distintas especies de microalgas que viven historias de aventuras e acción para todos os públicos, mentres loitan contra as distintas ameazas para o medioambiente.

Nesta última entrega, Microalgas. Máis alá da Terra, culminarán a súa viaxe en Marte, un planeta que alberga a esperanza para o futuro da vida.