Máis de 120 profesionais do sector turístico déronse cita este pasado xoves no workshop de CEAV Protour 2026 co obxectivo de crear e manter un contacto directo entre axencias de viaxes e provedores. O evento levouse a cabo nas instalacións do Hotel NH Collection Finisterre e nel o sector tivo a oportunidade de compartir experiencias e inquedanzas polo futuro ademais de descubrir novas propostas.

A xira CEAV Protour cumpriu a súa quinta edición en Galicia e a súa cuarta na cidade herculina, e contou con preto de 80 axentes de viaxes locais e 40 expositores. Algúns dos temas tratados versaron sobre as novidades das compañías aéreas, aseguradoras, navieiras, destinos turísticos e empresas de servizos no sector.

No acto inaugural participou o director da Área de Turismo da Concellaría de Cultura e Turismo da Coruña, Nacho Dopico, quen destacou que "establecer relacións entre axencias, provedores e administracións é un paso importante para seguir medrando e posicionando A Coruña como un dos grandes destinos turísticos de España". Acompañaron a Dopico o presidente da Confederación Española de Agencias de Viajes (CEAV), Carlos Garrido; a presidenta da Asociación Galega de Axencias de Viaxes (AGAVI), Mar Rodríguez, e o vicepresidente da Deputación da Coruña e deputado de Promoción Turística, Artesanía, Comercio e Cadea Agroalimentaria, Xosé Regueira.

O CEAV Protour é un proxecto da CEAV- Confederación Española de Agencias de Viajes en colaboración co Concello da Coruña, a Deputación da Coruña, MEGA Mundo Estrella Galicia e a asociación AGAVI.