As Festas de María Pita 2026 continuarán este luns 10 de agosto cunha das grandes propostas familiares da programación deste verán. O espectáculo 'O Libro da Selva. O musical', producido por Ártika Teatro, chegará á cidade cunha reinterpretación contemporánea do clásico de Rudyard Kipling que combina teatro, música en directo, coreografías e unha potente posta en escena visual. 

A montaxe presenta unha lectura actualizada da historia de Mowgli, convertendo a selva nun espazo simbólico inspirado na propia cidade e trasladando os personaxes a códigos culturais próximos ás novas xeracións. A proposta aborda cuestións como a diversidade, a convivencia, a cooperación, a identidade e a sustentabilidade ambiental, mantendo ao mesmo tempo a esencia da obra orixinal. 

O concelleiro de Cultura e Turismo, Gonzalo Castro, destacou a importancia de incluír espectáculos familiares de gran formato na programación municipal. "Desde o Goberno de Inés Rey queremos que as Festas de María Pita sexan unha celebración para todas as idades. 'O Libro da Selva' é un exemplo de como é posible combinar entretemento, calidade artística e transmisión de valores nun espectáculo pensado para compartir en familia", sinalou.

A obra segue a historia de Mowgli, unha nena criada por unha manada de lobos que debe atopar o seu lugar dentro da comunidade. No seu percorrido atopará figuras tan coñecidas como Baloo, Bagheera, Kaa ou Shere Khan, personaxes que simbolizan distintas formas de entender o mundo e que acompañan á protagonista nun proceso de aprendizaxe sobre a convivencia e a cooperación. 

Un dos elementos máis singulares da produción é a súa aposta estética. Os animais do relato clásico transfórmanse en tribos urbanas contemporáneas: os lobos inspíranse na cultura punk, os monos no hip-hop, Kaa incorpora influencias flamencas e Shere Khan aparece asociado a unha imaxe de poder e autoridade contemporánea.  A montaxe destaca tamén pola súa aposta pola música orixinal e por unha escenografía que combina elementos naturais e urbanos. Estruturas metálicas, grafismos luminosos, coreografías dinámicas e unha importante dimensión visual contribúen a converter o espectáculo nunha experiencia inmersiva para o público. 

A produción está dirixida por Marcos Alonso e conta cun elenco formado por Rocío Salgado, Yoel Alonso, Fernanda Barrio, Marcos Alonso e Irene Lorenzo, intérpretes especializados en teatro musical e familiar.