O barrio da Gaiteira renderá homenaxe este venres 14 de agosto a Cañita Brava, unha das figuras máis populares e queridas vinculadas á historia recente do barrio. O acto, organizado polo Concello da Coruña e pola Asociación Veciñal e Cultural Oza-Gaiteira-Os Castros, terá lugar ás 19.00 horas na rúa da Gaiteira e forma parte da programación das Festas da Gaiteira 2026.

Durante a homenaxe, á que asistirá a alcaldesa, Inés Rey, farase entrega dun diploma de recoñecemento e descubrirase unha placa conmemorativa que servirá para manter viva a memoria dunha persoa moi vinculada ao barrio e á súa identidade. Rey destacou a importancia deste recoñecemento. "Cañita Brava forma parte da memoria sentimental de varias xeracións de coruñeses e coruñesas. É unha persoa moi popular e querida que nunca esqueceu as súas raíces nin a súa vinculación coa Gaiteira, e esta homenaxe é unha maneira de devolverlle todo o agarimo que sempre recibiu da veciñanza", sinalou.

A rexedora subliñou tamén o valor da memoria colectiva nos barrios da cidade. "Os barrios constrúense a través das persoas que lles dan personalidade, que forman parte da súa historia e que deixan pegada na vida da súa xente. Preservar esa memoria é unha forma de fortalecer a nosa identidade colectiva e o noso sentimento de pertenza", indicou.

Unha fin de semana de festa na Gaiteira

As Festas da Gaiteira 2026 desenvolveranse entre os días 14 e 16 de agosto cun amplo programa de actividades culturais, musicais e familiares repartidas entre a rúa da Gaiteira e o Parque Europa.

A programación comezará o venres 14 cun pasarrúas ás 18.00 horas e coa homenaxe a Cañita Brava ás 19.00 horas. Durante a noite celebrarase unha nova edición do Lembranza Rock, que contará co pregón de Gonzalo Castro, concelleiro de Cultura e Turismo, ás 20.30 horas e cos concertos de Zavala + Cantareiras, Loita Amada e Grande Amore a continuación.

O sábado 15 haberá pasarrúas, feira de artesanía, actividades familiares, batucada e espectáculos de rúa. Pola noite continuará o Lembranza Rock coa actuación de Boogies, Océano Eskizo, Ortiga e a sesión de Rapariga DJ.

As festas rematarán o domingo 16 cunha sesión vermú a cargo de Momboi, seguida das actuacións de Bule Bule Band e Filloas, que porán o peche á edición deste ano.