O Concello da Coruña participará na campaña estatal de observación segura da eclipse total de Sol do vindeiro 12 de agosto mediante o reparto gratuíto de lentes homologadas para observación solar nos Museos Científicos Coruñeses. As lentes entregaranse ás persoas maiores de 16 anos que accedan aos museos municipais ata esgotar existencias.

A iniciativa forma parte da campaña 'Una vista única. Cuídala', promovida polo Ministerio de Ciencia, Innovación e Universidades e o Grupo Social ONCE para fomentar a observación segura do denominado 'Trío de Eclipses 2026-2028' e previr os riscos oculares asociados á contemplación directa do Sol. No marco desta actuación distribuiranse en toda España dous millóns de lentes certificadas, das que 300.000 serán canalizadas a través da Fundación Española para la Ciencia y la Tecnología (FECYT) entre museos, centros de investigación e entidades científicas, entre eles os Museos Científicos Coruñeses.

Os Museos Científicos Coruñeses figuran entre os centros de ciencia seleccionados para participar nesta campaña estatal, que busca achegar á cidadanía os recursos necesarios para vivir con seguridade un fenómeno astronómico histórico que converterá Galicia e, particularmente, A Coruña, nun dos puntos de referencia para a súa observación.

O concelleiro de Cultura e Turismo, Gonzalo Castro, destacou a importancia desta medida para garantir unha observación segura do fenómeno. "A Coruña será un dos mellores lugares de Europa para observar a eclipse total de Sol do 12 de agosto e queremos que toda a cidadanía poida facelo con todas as garantías. Por iso, o Goberno de Inés Rey súmase a esta gran campaña estatal de observación segura e pon a disposición da veciñanza lentes homologadas e recursos divulgativos a través dos Museos Científicos Coruñeses", sinalou.

Este reparto complétase coas accións divulgativas que o Concello xa vén desenvolvendo nas últimas semanas. Entre elas atópase a distribución de caixas automontables para a observación indirecta da eclipse, destinadas ás familias con menores de 10 anos que participan nas sesións infantís do Planetario da Casa das Ciencias. Estas caixas permiten seguir o fenómeno mediante proxección, sen necesidade de mirar directamente ao Sol. Ademais, os Museos Científicos Coruñeses manteñen a disposición da cidadanía información específica sobre métodos seguros de observación, materiais divulgativos e recomendacións prácticas para a xornada do 12 de agosto.

O Concello lembra que só deben empregarse lentes certificadas conforme á norma ISO 12312-2, comprobando previamente que non presentan roturas, perforacións ou deterioros. Tamén insiste en que nunca se debe observar o Sol a través de prismáticos, telescopios, cámaras ou outros dispositivos ópticos sen filtros solares profesionais adecuados. "Queremos que a eclipse sexa unha experiencia extraordinaria para toda a cidadanía, pero tamén unha experiencia segura. A divulgación científica e a prevención deben ir da man dun acontecemento destas características", engadiu Castro.

Amplo dispositivo o 12 de agosto

O reparto das lentes súmase ao amplo dispositivo especial preparado polo Concello para o 12 de agosto. Este contempla preto de 300 efectivos de seguridade e emerxencias, reforzos no transporte urbano, aparcadoiros disuasorios nos campus universitarios e a habilitación de múltiples puntos de observación distribuídos polos barrios da cidade, todos eles identificados nun visor interactivo accesible desde a web municipal.

A eclipse total de Sol do 12 de agosto será un acontecemento excepcional que non volverá repetirse nestas condicións na cidade ata o ano 2180. A Coruña contará cunha posición privilexiada para a súa observación e espérase a chegada de milleiros de persoas para seguir un fenómeno astronómico de relevancia internacional.