O Concello da Coruña pecha este xoves 16 de outubro (ás 23.59 horas) o prazo para inscribirse na maior parte dos programas educativos municipais incluídos nunha nova edición do Plan Coruña Educa para o curso 2025/2026.

O prazo de inscrición abriuse o pasado 16 de setembro cunha ampla oferta educativa destinada ao alumnado dos centros da cidade (e de centros doutros concellos, no caso dalgunhas actividades), con actividades formativas en materia cultural, científica, social, lingüística, ambiental e de lecer.

Aínda permanecerán abertos os prazos de inscrición para os programas " V Concurso Imaxina Coruña 2025-26 (ata o 30 de outubro), " Visitas escolares ás bibliotecas 2025-26 (ata o 15 de novembro) e Vaia Banda 2025-26 (desde o 22 de outubro ata o 7 de novembro).

Ampliación do prazo de inscrición de varios programas

Ademais, amplíase o prazo de inscrición dos seguintes programas:

• Cinema na Escola 2025-26 (ata o 14 de novembro).
• Gargallada. Novas xeracións na comedia 2025-26 (ata o 14 de novembro).
• XXXV Mostra de Teatro Escolar 2025-26 (ata o 28 de novembro).

Os centros educativos interesados en participar nalgún dos programas poderán formalizar a súa participación a través da web educativa do Concello. Na maior parte dos programas a inscrición realizarase a través da ficha específica en liña do servizo de Educación. Nalgúns casos será necesario cubrir unha ficha que facilita a entidade encargada de desenvolver o programa (a ligazón estará especificada no cadro anexo e na información de cada programa).