A alcaldesa da Coruña, Inés Rey, e a conselleira de Medio Ambiente e Cambio Climático da Xunta, Ángeles Vázquez, asinaron hoxe no Palacio de María Pita a adhesión da Coruña ao Convenio Marco de Colaboración entre a Comunidade Autónoma de Galicia e Ecoembes, un acordo que fará posible a implantación na cidade dun quinto contedor, de cor gris, para a recollida separada de residuos de fracción resto antes de final de ano.

"A implantación do quinto contedor na cidade é un paso máis na adaptación do modelo de recollida de residuos da cidade ás novas esixencias da lexislación medioambiental", sinalou a alcaldesa, quen lembrou que A Coruña foi pioneira en España na separación de residuos grazas ao impulso do Goberno local e o apoio da cidadanía, que souberon converter unha traxedia ambiental como foi o derrube da entulleira de Bens nunha oportunidade de cambio.

"Con este convenio imos facer mellor o que xa estabamos a facer: separar en orixe para aumentar as porcentaxes de recuperación de residuos, reducir o envío a vertedoiro e traballar para alcanzar as metas que a Unión Europea nos marca para o futuro" sinalou a alcaldesa, quen anunciou a posta en marcha dunha gran campaña de información e sensibilización para que todos os veciños e veciñas se adapten con rapidez á utilización do novo contedor.

Pola súa banda, a conselleira destacou que agora mesmo en Galicia a porcentaxe de recollida de envases lixeiros é do 52% e hai que chegar ao 65% neste ano 2025. "Coa adhesión da Coruña a este convenio marco vanse cumprir os obxectivos a nivel europeo e estatal" , destacou.

A alcaldesa lembrou que mentres noutros concellos de España e de Galicia o novo quinto contedor supuxo empezar a separar o orgánico (marrón) ou os envases, o modelo coruñés xa separa esas fraccións e conta con eses colectores. O actual contedor amarelo quedará para envases lixeiros (botellas e botes de plástico, filme plástico, latas e brics, cartón para bebidas...) e o novo contedor que pronto verán os veciños nas rúas será de cor gris, destinado á fracción resto e no que se depositarán residuos como as barreduras domésticas, cabichas de cigarros, produtos sanitarios como cueiros, compresas e tampóns, restos de louza e, en xeral, todo aquelo que non teña como destino o resto dos contedores. 

"En definitiva, imos separar mellor para reciclar máis", sinalou Rey, quen agradeceu á conselleira a súa disposición para chegar a un entendemento e poder dar os pasos necesarios para a posta en marcha do quinto contedor este mesmo ano.